തിരുത്ത്‌

"കുട്ടികളോട് 

മര്യാദക്കു പെരുമാറണം,"

അമ്മ കംസനോട് പറഞ്ഞു.

കംസന്‍ കേട്ടു,അനുസരിച്ചില്ല.

കാലം തിരുത്താത്തത് കാലന്‍ തിരുത്തി.

പരിഭവം

മദ്ധ്യാഹ്ന വെയിലില്‍ ദിവാസ്വപ്നങ്ങള്‍ക്ക് ചൂട് പിടിക്കുമ്പോള്‍

നിദ്രാബദ്ധമായ എന്റെ  കണ്ണുകള്‍ 

കാമാതുരങ്ങളായ എന്റെ രാത്രികളോട് കലഹിക്കുന്നു. 

അവയ്ക്ക് വേണ്ടത് നിന്നെയാണ്.

കണ്ണുകള്‍ക്കും,ദിവാസ്വപ്നങ്ങള്‍ക്കും,

കാമാതുരങ്ങളായ എന്റെ രാത്രികള്‍ക്കും.

ഒരു വില്‍(പ്പന ) പാട്ട്

ഉള്ളില്‍ തിളച്ചു മറിയുന്നത്  എന്റെ മാത്രം സൃഷ്ടിയല്ല. 

തെളിഞ്ഞും മറഞ്ഞും നിങ്ങള്‍ എന്റെ ഉള്ളില്‍ കോറിയിട്ട മുറിപ്പാടുകളാണ്.

ചെഞ്ചായം പൊടിയുന്ന വരക്കൂട്ടുകള്‍. 

ചെരിച്ചും തിരിച്ചും മറിച്ചും പിടിച്ചു നോക്കിയിട്ടും 

ഇതില്‍ ഞാന്‍ പതിച്ച 

എന്റെ കയ്യൊപ്പെനിക്കു 

കാണാനാവുന്നില്ല.

ദയവായി ഇത് മടക്കി വാങ്ങി 

എന്റെ കയ്യൊപ്പെനിക്ക്  എനിക്ക് 

തിരിച്ചു നല്‍കണം.

ഇതില്‍ കലയെവിടെ സുഹൃത്തേ?

നിങ്ങളുടെ സൃഷ്ടികളുടെ നഗ്നത 

ഞങ്ങളുടെ കണ്ണുകളെ ത്രസിപ്പിക്കുന്നു.

ഹൃദയത്തെ  കുഴപ്പിക്കുന്നു.

രഹസ്യമായി ആസ്വദിക്കാവുന്ന 

സത്യങ്ങളുണ്ടോ  കയ്യില്‍?

രഹസ്യമായാസ്വദിക്കാന്‍ 

നല്ല രഹസ്യങ്ങളുണ്ട്.

മൂപ്പ് കുറഞ്ഞ രണ്ടെണ്ണം എടുക്കട്ടെ?

അതല്ലെങ്കില്‍ 

കടുപ്പത്തിലൊരു 

'ചായ '?

അതുമല്ലെങ്കില്‍ 

എളുപ്പത്തിലൊരു 

'കോടി'?

എടുക്കട്ടെ?

എടൊ തനിക്കെന്തറിയാം?

അറിയാനൊരു രഹസ്യം 

ഞങ്ങളങ്ങോട്ടു പറയാം.

പെടക്കുന്ന പത്തു രഹസ്യങ്ങള്‍

 പടച്ചു വിട്ടിട്ടു വരുന്ന വഴിയാ, സുഹൃത്തേ!

വേണേലോരെണ്ണം ചൂടോടെ കേട്ടോ .

"നിങ്ങളുടെ ദൈവത്തിനു ഞങ്ങള്‍ വിളിക്കുന്ന പേര് 

ദൈവനിഷേധം"

ഇതിലെന്ത് രഹസ്യം?

നിങ്ങള്‍ തന്നെ പറയണം .

ചിലരുടെ മെരുക്കം 

പലര്‍ക്കും ചോരുക്കല്ലേ?

രഹസ്യ സ്വഭാവമില്ലാത്തതെങ്ങനെ രഹസ്യമാകും?

ശരിയല്ലടോ!

ഈ രഹസ്യങ്ങളൊന്നും ശരിയല്ല.

പണ്ടത്തെ പോലൊന്നും അല്ലിപ്പൊ 

രഹസ്യ സ്വഭാവം ഇപ്പോള്‍ പരസ്യങ്ങള്‍ക്ക് മാത്രമേ ഉള്ളു.

ആസ്വാദനത്തിലാണ്‌ രഹസ്യം.

അതിപ്പോ രഹസ്യമായാലും പരസ്യമായാലും.

രഹസ്യമായാസ്വദിക്കാന്‍ 

നല്ല പരസ്യങ്ങള്‍ പത്തുണ്ടോ സുഹൃത്തേ?

രഹസ്യമായി വേണം 

പണം പിന്നെത്തരാം.

ഉത്തരങ്ങള്‍ ?

ഉന്മാദങ്ങളുടെ മദപ്പാടുകള്‍ക്ക് 

ഒരു പിന്നണിയെന്നോണം 

ഇതെനിക്ക് ഭ്രാന്തിന്റെ 

ഉത്തരകാലം.